Gaddi kabita

।।गद्दी बणी गै अप-टू-डेट। । गद्दी अबै सो गद्दी न रैह बणी गै अप-टू-डेट। लुण्डे मन्झ खाणा छड़ी दिता पकड़ी लेइ प्लेट। भैड़ा बकरी पालना छड़ी बेईठै , आतै पकड़ी लेई किताब। कुछ भर्ती भुची गै कुछ नेता बणी गै कुछ बणी गै साहब। अपणा पैहराबा छड़ी बेईठै , पाई लेई टाईट जीन। ब्रांडड कपडै होऊं घट गल्ल न करँदै , भुछि गै बडै शौकीन। अपणी भाषा मंझ गल्ल न करँदै , बणी गै बडै अंग्रेज। हाय हेल्लो बडै शोंक तै बलन्दे , माँ बोल्ली रा करँदै परहेज। रीति रीवाज भी बदली दितै , कजो रैहणा बलन्दे असू पीछै। मुंह मंगा दहेज लगै लैणा , हर रश्मा पर दिँदै अबै गैहणा। उँन्नाली टल्ली हेरी ता , अपणा मुंह लैंदै फेरी। सोचन्दे पता लगी गो की आऊं गद्दी , ता बेज्जती भुणि मेरी। मिल्ली झुल्ली करी रैन्दै थिये , खुऐडा पाई कम चलादें थिये। अक्की दुए जो अबै हेरी न राजी , अप टू डेट जे भुची गै गद्दी भाजी। सूर,झोला रा कोई नाम न लैंन्दे, विशकी ब्रांडी रा रोज पेग हिन् पंदै। शीड्डू,घिंगा अबै कोई न खंदै, बरगर, पिजा खाई कम चलन्दे। गद्दी अबै सो गद्दी न रैह बणी गै अप-टू-डेट। लुण्डे मन्झ खाणा छड़ी दिता पकड़ी लेइ प्लेट।